Dünya avtomobil tarixində Daymlerin və Benzin “özüyeriyən ekipajı” hansı rolu oynayıbsa, bu model də lüks avtomobillər tarixində analoji rolu oynayıb. Məhz Silver Ghost modeli “Lüks” sinfinin əsasını qoyub. Avtomobilin ixtirasından az sonra, artıq ötən əsrin 10-cu illərinin ortalarından başlayaraq, bu modeli elektrik faraları ilə təchiz etməyə başladılar. Silver Ghost avtomobilini yalnız ən varlı adamlar ala bilərdilər, bu avtomobil dünyanın ən nüfuzlu şəxsiyyətlərini daşıyıb (o cümlədən dünya proletariatının rəhbərini). Rolls-Royce bu modeli “Best car in the World” (“Dünyanın ən yaxşı avtomobili”) devizi altında satırdı.

Packard Twin Six (1915) 

Packard Amerikada bir çox sahələrdə ilk cığır açmış şirkətdir: onun təsisçisi Ceyms Pakkard ABŞ-da birinci avtomobili hazırlayıb, sonradan sahibkar Henri Boyd Coy tərəfindən alınan şirkət ABŞ-da lüks avtomobillərin aparıcı istehsalçısına çevrilib. 1915-ci ildə şirkət Twin Six modelini təqdim edərək dünya miqyasında böyük uğur qazanıb: bu, tarixdə ilk seriyalı avtomobil idi ki, V12 mühərriki ilə təchiz olunmuşdu. Bu model çar Rusiyasında da kifayət qədər məşhur idi. Bu avtomobillərin bütöv bir partiyası Birinci Dünya müharibəsi zamanı rus ordusu üçün satın alınmışdı: onlardan qərargah avtomobilləri kimi istifadə olunurdu.

Cadillac 60 Special (1948) 

1948-ci ildə buraxılmış 60-cı seriyalı məşhur “Kadillak” modeli təkcə texnika sahəsində deyil, dizayn sahəsində də əsl dönüş etdi. Məhz bu avtomobillərdə “üzgəc” formasında arxa “qanadlar” peyda oldu. Onların dizaynı Lockheed P-38 hərbi təyyarəsinin aerodinamik stabilizatorlarından götürülmüşdü. Avtomobil həvəskarları və mütəxəssislər bu versiyanı böyük coşğu ilə qarşıladılar, digər istehsalçılar isə tədricən öz modellərində ondan istifadə etməyə başladılar. Tədricən “üzgəclərin” forması dəyişdi və ölçüləri böyüyərək 60-cı illərin sonlarında ən iri həddə gəlib çatdı.

Ferrari 250 GT (1953)

İndi bu cür avtomobillə kimisə təəccübləndirmək mümkün deyil. 50-ci illərin ortalarında isə, o, irəliyə doğru böyük bir sıçrayış idi.Ferrari 250 idman avtomobilinin hərəkət və idarəetmə keyfiyyətlərinə malik model idi. Bundan başqa, o, komfortlu avtomobil idi və interyeri lüks sedanına layiq keyfiyyətli materiallardan hazırlanmışdı. Bu avtomobil çoxlu modifikasiyalarla buraxıldı (bu gün onların əksəriyyəti kolleksiyaçılar üçün olduqca əhəmiyyətli sayılır) və 11 ilə yaxın müddət ərzində konveyerdən düşmədi. Bir çox mütəxəssislər hələ də Ferrari 250-ni bütün dövrlərin ən yaxşı idmansayağı avtomobili hesab edirlər.

Citroen DS (1955)

İlk öncə DS avtomobili kütləvi tələbat üçün nəzərdə tutulmuş avtomobil sayılırdı. Amma onun qeyri-adi, cəsarətli və yaraşıqlı dizaynı (qeyd edək ki, həmin dizayn bu gün də köhnəlməyib), qabaqcıl texniki detalları (klirensi dəyişməyə imkan verən hidropnevmatik asqı, diskli əyləclər, sükanın və əyləclərin hidravlik gücləndiriciləri, avtomatik bəndləyicilər), habelə yüksək kifayət qədər yüksək keyfiyyətli materialları  bu avtomobili tez bir zamanda varlı insanların arzuladığı avtomobilə çevirdi. DS avtomobili ilə hərəkət edən şəxslər arasında təkcə Fransa Prezidenti Şarl de Qollun adını çəkmək kifayətdir. 1962-ci ildə bu avtomobil, sözün əsl mənasında, onun həyatını xilas etdi: prezidentin həyatına sui-qəsd zamanı avtomobilə çoxsaylı atəşlər açıldı, amma onlar avtomobili hərəkət kursundan sapdıra bilmədi və sürücü avtomobili atəş selinin içərisindən çıxararaq prezidenti xilas edə bildi.

BMW 3-Series (1975)\\r\\n

“3-cü seriya”nın birinci nəsli populyar “2002” kupesinin əvəzləyicisi kimi buraxıldı. Bu modelin ikinci nəsli isə tarixə E30 kuzovu ilə düşdü. Əla idarəolunma keyfiyyəti, yüksək keyfiyyətli interyeri və , ən əsası yüksək səmərəliliyi və rəvan işi ilə seçilən altı silindrli mühərrikləri sayəsində BMW 3-cü Seriya tez bir zamanda avtomobil həvəskarlarının rəğbətini qazandı. Məhz E30 kuzovlu BMW 3-cü Seriya avtomobilinin uğuru Mercedes-Benzi 190E kuzovlu analoji model buraxmağa sövq etdi.

Mercedes-Benz S-Class W126 (1978)

“126-cı” modelin tarixi modelə çevrilməsinin bir neçə səbəbi var.Birincisi, bu, rəsmən “S-Class” adlandırılmış ilk Mercedes-Benz modeli idi; ikincisi, avtomobilin dizaynı uzun illər şirkətin bütün modellərinin dizayn üslubunun inkişaf istiqamətini müəyyən etmiş oldu; nnəhayət, üçüncüsü, 1978-ci ilin Mercedes-Benz S-Class W126 avtomobili əyləclərin bloklanması əleyhinə elektron sistemlə təchiz olunmuş ilk seriyalı avtomobil oldu.

BMW M5 (1985)

E28 kuzovlu BMW 5-ci Seriya avtomobilinin bazasında hazırlanmış bu avtomobil 80-ci illərin ortaları üçün unikal keyfiyyətlərə malik idi.Təchizatına və komfortuna görə o, “biznes-klass” modellərindən geri qalmırdı. 3,5 litr həcmə və 286 at gücünə malik mühərriki sayəsində M5 cəmi 6,2 saniyəyə 100 km/saat sürət yığa bilirdi. İstehsalına başlanılarkən bu avtomobil dünyada seriya ilə buraxılan ən sürətli sedan idi!

Audi A8 (1994)

Audi dünya avtomobil sənayesində əsas rəqiblərindən (BMW və Mercedes-Benz-dən) bir qədər sonra debüt etdi. Əvəzində bu debüt bütün dünyanı heyran qoydu. Şirkət avtomobil həvəskarlarına A8 modelini təqdim etdi: bu, bütünlüklə alüminium platformada hazırlanmış ilk seriyalı avtomobil idi. Alüminium materialı avtomobilin çəkisini xeyli azaltmağa imkan yaratdı. Debütündən üç il sonra A8 modeli daha bir “dünya rekordu” müəyyən etdi. O, 6 təhlükəsizlik yastığı ilə təchiz olunmuş ilk avtomobil oldu.

Lexus LS 600h (2007)

Uzun illər Lexus avtomobilləri Audi, Mercedes-Benz və BMW markalı analoqları ilə müqayisədə həm xarici görünüşü, həm də konstruksiyası baxımından bir növ ikinci dərəcəli avtomobil sayılırdı. 2000-ci illərin ortalarında LS sedanlarının dördüncü nəsli işıq üzü gördükdən sonra vəziyyət kökündən dəyişdi. İlk dəfə bu avtomobillərdə 8 pilləli avtomat transmissiya peyda oldu, amma əsas yenilik Lexus LS 460h modeli oldu: bu, dünyada hibrid benzin-elektrik güc aqreqatı quraşdırılmış ilk sedan idi. Bu gün Lexus avtomobilləri BMW və ya Mercedes-Benz-dən heç də geri qalmırlar.