İki nəqliyyat vasitəsinin iştirakı ilə ağır yol qəzası baş verib.

Avtoyol.az Avtosfer.az-a istinadla  xəbər verir ki, hadisə sentyabrın 21-də Rusiyanın İrkutsk əyalətində  “Sibir” avtomagistralının Usolısk rayonu ərazisindən keçən hissəsində qeydə alınıb.

Məlumata görə, avtomagistralda xidmət aparan yol patrul xidmətinin əməkdaşları, “Toyota Cresta” markalı minik avtomobilinə “Saxla” əmri verib, ancaq sürücü əmrə tabe olmayaraq yoluna davam edib. Bundan sonra isə təqib başlayıb, lakin bu qısa sürüb.

Polisdən qaçmağa çalışan sürücü, yüksək sürətlə idarə etdiyi avtomobillə, ötmə əməliyyatını yerinə yetirən zaman, yolun əks istiqamətinə çıxıb və qarşıdan gələn TIR-la toqquşub.

Zərbənin şiddətindən minik avtomobili iki hissəyə bölünüb.

Qəza nəticəsində “Toyota”nın sürücüsü və 4 sərnişini aldıqları ağır bədən xəsarətlərindən hadisə yerində ölüblər, TIR-ın sürücüsü isə yüngül yaralanıb.

Hazırda faktla bağlı araşdırma aparılır.