"Restaylinq"kifayət qədər yeni termindir, amma avtomobil aləmində tez-tez işlənir. Bir neçə il əvvəl KAMAZ Açıq Səhmdar Cəmiyyəti istehsal etdiyi yük avtomobillərinin kabinələrinin simasını dəyişmək üçün restaylinq əməliyyatını həyata keçirməyi qərara aldı. Beləliklə, üslub dəyişikliyinə uğramış KAMAZ kabinələri təkcə parlaq və nəzərə çarpan zahiri görünüş ilə deyil, həm də genişliyi, komfortluluğu və təhlükəsizliyi ilə diqqəti cəlb edir. Kabinənin yeni modeli hazırlanarkən məhz komfortluluq və təhlükəsizlik məsələləri prioritet təşkil edib. Qeyd etmək lazımdır ki, zavodun mühəndisləri və konstruktorları bu vəzifənin öhdəsindən layiqincə gəliblər. Artıq kabinəyə qalxan kimi bunu hiss edirsən – kandarda sürüşmə əleyhinə üstlüklər qoyulub ki, bu da xüsusən əlverişsiz hava şəraitində kabinəyə qalxmanı asanlaşdırır.

Kabinənin damının hündürlüyü artırılıb, içərisi isə genişlənib. Yeni dəstəklər və deflektorlarla qorunan kilidlər kabinənin qapılarını rahat və etibarlı şəkildə açıb-bağlamağa imkan verir. Kabinədə yaraşıqlı yeni bamper peyda olub. Bu, müştərilərin istək və xahişlərinə KAMAZ ASC mütəxəssislərinin reaksiyasının nəticəsidir.

Restaylinq olunmuş kabinənin xüsusi üzlük materialı səs izolyasiyasını əlavə gücləndirməyə xidmət edir ki, bu da sürücünün öz işini daha komfortlu şəraitdə və deməli, həm də effektiv şəkildə yerinə yetirməsini təmin edir. Zavod rəhbərlərindən birinin sözlərinə görə, kabinənin yeni modeli layihələşdirilərkən bu sözlər əsas deviz kimi qəbul edilib: "Lüzumsuz heç bir şeydən  istifadə etməməli: yalnız ən lazımlı və faydalı şeylərdən istifadə etməli". Qeyd edək ki, kabinə təkcə erqonomikliyi və funksionallığı ilə deyil, həm də, həqiqətən, rahat və komfortlu olması ilə seçilir.

Sürücü və sərnişin oturacaqları pnevmatik asqı ilə təchiz olunub, onun əsas funksiyası onurğa sütununa mənfi təsir göstərən vibrasiyaların qarşısını almaqdır. Yəqin ki, oturacaqların dörd tənzimləmə rejiminin olması sürücülərin ürəyincə olacaq. Restaylinq olunmuş kabinələr komplektasiyadan asılı olaraq bir və ya iki yataq yeri ilə təchiz olunacaqlar.

Kabinənin yeni modelinin yaxşılaşdırılmış optikası barədə ayrıca danışmağa dəyər. Belə ki, məhz işıqlandırma sistemi günün istənilən saatlarında ideal görmə imkanlarını təmin edir. Penopoliuretandan hazırlanmış cihazlar paneli konstruksiyanı daha da yüngülləşdirib, cihazların düzgün şəkildə yerləşdirilməsi və panelin bloklanma əleyhinə örtüyü, habelə rahat qrafikalı displey və cihazların əqrəbləri, eləcə də nəzarət siqnalizatorlarının rahat kombinə edilməsi sürücünün diqqətini yoldan ayırmadan zəruri məlumatları əldə etməsinə imkan yaradır.

avtomobil.az