VAZ 2106 modeli VAZ zavodunda hazırlanmış sovet minik avtomobilidir. 1976-cı ildən 2006-cı ilədək seriya ilə buraxılıb. "06"-nın əsasını italyan modeli FIAT 124 Speciale-nin 1972-ci il nümunəsi təşkil edir. VAZ 2106 modeli VAZ avtomobillərinin istehsal edildiyi bütün dövrlər ərzində ən populyar modellərdən birinə çevrildi.

Yeni modelin ilk nüsxəsi konveyerdən 21 fevral 1976-cı ildə çıxdı. Mahiyyət etibarı ilə VAZ 2106 modeli VAZ 2103-ün daha güclü mühərrik quraşdırılmış və fərqli tərtibata malik lüks versiyası idi. Bu avtomobil 1970-ci illərin sonlarının ən prestijli modellərindən idi. Standart komplektasiya olduqca zəngin idi: buraya baş altlıqları ilə təchiz olunmuş yeni oturacaqlar və üzərində taxometr və saat olan cihazlar paneli daxil idi. Bu avtomobillər əla dinamikası və yaxşı yığım keyfiyyəti ilə tanınırdı. İlkin dövrlərin modelləri yaxşı səs izolyasiyası ilə seçilirdilər.

1970-ci illərin sonlarında VAZ zavodu VAZ 2106-nın daha zəif versiyalarını buraxmaqla model cərgəsini genişləndirdi. Bu avtomobillərə "21011" və "2103" modellərinin mühərrikləri quraşdırılırdı. Bu modifikasiyalarda "06"-ya xas olan dinamika itirilsə də, daxili bazarda VAZ 2106-nın qıtlığı ucbatından onlar kifayət qədər populyar idilər. 1982-ci ildə modelin ilk ciddi modernləşdirilməsi həyata keçirildi: onu 75 at gücünə malik yeni mühərriklə təchiz etməyə başladılar, salonun tərtibat elementlərində dəyişiklik edildi, arxa qanadlardan karafotlar götürüldü. 1990-cı ildən VAZ "lüks" modifikasiyanın buraxılışına başladı, ona "21065" indeksi verildi. Bu avtomobil təmassız yandırma sisteminə malik olması, yeni karbüratoru, fərqli əsas faraları və salonunun yeni üzlüyü ilə fərqlənirdi.

VAZ 2106 xaricə geniş şəkildə ixrac olundu. İxrac olunan modifikasiyaların əsas fərqli cəhəti, salonun tərtibatındakı kiçik dəyişikliklərdən əlavə, həm də dönmə işıqları və qabaritli faralarla inteqrasiya olunmuş qabaq bamperlərdə idi. 1970-ci illərin sonlarında məxsusi olaraq L.İ. Brejnev üçün hazırlanmış xüsusi modifikasiya da mövcud idi. Hazırlanmasında VAZ 2107-nin materiallarından istifadə edildiyinə görə ona "yeddinin yarısı" adını vermişdilər, həmin vaxt "07" hələ hazırlanma mərhələsində idi. Xüsusi modifikasiya yalnız bir nüsxədə buraxıldı.

1980-ci illərin sonlarında VAZ 2106 modeli VAZ zavodunun ən populyar və kütləvi modellərindən biri idi. SSRİ dağıldıqdan sonra modelin yığım keyfiyyəti və prestiji xeyli aşağı düşdü, amma bu, avtomobilin 2006-cı ilədək konveyerdə qala bilməsinə mane olmadı. İstehsalının son illərində bu modeli İjevskdəki zavodda yığırdılar. Modelin 2000-ci illərdə buraxılmış nüsxələrinə birbaşa yanacaqçiləmə sistemi ilə təchiz olunan modernləşdirilmiş 2106 mühərrikləri quraşdırılırdı. Sonuncu VAZ 2106 avtomobili İjevskdəki zavodun konveyerindən 2006-cı ilin yanvarında çıxdı.

Dizayn

VAZ 2106 modelinin xarici görünüşü 1970-ci illərin sonları üçün kifayət qədər müasir idi. İstehsal prosesində avtomobilin xarici görünüşü xırda dəyişikliklərə məruz qalmışdı. Bu model VAZ 2103-dən yeni radiator barmaqlığı, fərqli arxa fənərləri və salonun tərtibatı ilə fərqlənirdi. Avtomobilə orijinal sükan, cihazlar paneli və oturacaqlar quraşdırılmışdı.

Mühərrik

İstehsal müddəti ərzində modelin müxtəlif gücə malik mühərriklər quraşdırılmış çoxlu modifikasiyaları işıq üzü gördü. Orijinal 2106 modifikasiyasına 1,6 litr həcmə və 80 at gücünə malik güc aqreqatı quraşdırırdılar. Həmin dövrdə o, SSRİ-də ən güclü sedanlardan biri idi. Onun 100 km/saat sürət yığmasına 16 saniyə sərf olunurdu. Modelin maksimal sürəti isə 150 km/saat təşkil edirdi. 1970-ci illərin sonlarında 21061 modifikasiyası işıq üzü gördü. Ona 74 at gücünə malik VAZ 2103 mühərriki quraşdırılırdı. Elə həmin dövrdə 21063 modifikasiyası da peyda oldu, ona 64 at gücünə malik VAZ 21011 mühərriki quraşdırılırdı. 1982-ci ildən VAZ 2106-ya 75 at gücünə malik olan modernləşdirilmiş orijinal mühərriklər quraşdırmağa başladılar. 

Modifikasiyalar:

VAZ 21061 – VAZ 2103 mühərriki quraşdırılmış modifikasiya

VAZ 21063 – VAZ 21011 mühərriki quraşdırılmış modifikasiya

VAZ 21062 – idarəetmə orqanları sağda yerləşən modifikasiya

VAZ 21065 – VAZ 2105 mühərriki quraşdırılmış modifikasiya

VAZ 21066 – idarəetmə orqanları sağda yerləşən və VAZ 21011 mühərriki quraşdırılmış modifikasiya

VAZ 21067 – VAZ 2107 mühərriki quraşdırılmış və birbaşa yanacaqçiləmə sistemi ilə təchiz olunmuş modifikasiya (İjevskdə buraxılırdı)

VAZ 2106 Turist – çadırla təchiz olunmuş modifikasiya. Bu model seriya ilə buraxılmırdı. 

VAZ 21067-20 – eksperimental injektorlu mühərriklə təchiz olunmuş modifikasiya

VAZ 21069 – eksperimental rotorlu VAZ-411 mühərriki ilə təchiz olunmuş modifikasiya

VAZ 2106 "yeddinin yarısı" – tərtibat elementləri fərqli olan eksperimental modifikasiya

Texniki xarakteristikalar:

Buraxılış ili: 1976-2006

Ölçülər (uz/en/hünd.): 4116x1611x1446

Quruluş: mühərrik qabaqda

Aparıcı təkərlər: arxadakılar

Kuzov: sedan

Mühərrik: VAZ 2106

Silindrlərin sayı: 4

Mühərrikin həcmi: 1,57 litr

Klapanların sayı: 8

Yerləşdikləri yer: yuxarı

Güc (at gücü/kilovatt): 80/58,8 (1 dəqiqədə 5400 fırlanma dövrəsi ilə)

Ötürücü qutu: beşpilləli mexaniki

Ön tərəfdəki əyləclər: diskli

Arxa tərəfdəki əyləclər: barabanlı

Elektrik avadanlıqları: 12 V

Şinlərin ölçüsü: 175/70R13