Koronavirus pandemiyasının ikinci dalğasının yayılma ehtimalına qarşı profilaktik tədbirlər həyata keçirilir. 

Avtoyol.az Milli.Az-a istinadla xəbər verir ki, Cənubi Koreya Xəstəliklərə Nəzarət və Profilaktika Mərkəzi bu istiqamətdə koronavirusla mövsümi qripi eyni anda test edə bilən, dolayısı ilə bir-birinə çox bənzəyən simptomları ayırd edən test kiti hazırlamaq niyyətindədir.

Mərkəzin idarəçisi Ceonq Eun-Kyeonq koronavirusla mövsümi xəstəliklərin ortaq simptomlara malik olduğuna, pandemiya ilə mübarizədə onları bir-birindən ayırd etməyin əhəmiyyətinə toxunub.

Sözügedən testin diaqnoz üçün lazım olan müddəti qısaldacağı da bildirilir.

Test kiti Qida və Dərman Təhlükəsizliyi Nazirliyinin təsdiqini gözləyir. Təsdiqin qrip mövsümündən əvvəl alına biləcəyi vurğulanır.

Qeyd edək ki, koronavirusun ən çox görülən simptomlarından olan qızdırma, öskürək və halsızlıq həm də qripin əlamətləridir.