Havalandırma sisteminin yumru formalı yan deflektorlarını çıxmaq şərti ilə, interyer dizaynı sizə tanış gələ bilər. Multimedia sisteminin planşeti, klimat-kontrolun idarəetmə bloku, ikiqollu sükan çarxı və VAG avtomobillərinə məxsus olan işıq düymləri dizaynerlərin Skoda şirkətinin hazırki interyer dizaynından uzaqlaşdıqları mənasına gəlmir. DSG transmissiyanının iri dəstəyi və əl əyləcinin ənənəvi qolu subkompakt modelin sadə MQB A0 platformasına əsaslandığından xəbər verir.

Rəqəmsal cihazlar paneli artıq Fabia modeli üçün əlçatan olsa da, əlavə ödəniş tələb edəcəkdir. Bu, hetçbekin sadə versiyalarının ənənəvi cihazlar paneli ilə təchiz ediləcəyindən xəbər verir. Üstəlik, burada təəəcüblü bir şey yoxdur - çünki daha iri Octavia modelinin sadə versiyaları da belə cihazlar paneli ilə təklif edilir.

Dərc edilmiş eskizə əsaslanaraq, hetçbekin salon genişliyi barədə mülahizə yürütmək çətindir, amma yeni Fabia modelinin öz seqmentində ən iri avtomobil olacağını nəzərə alsaq, bunun daxili məkana da müsbət təsir edəcəyini güman etmək olar. Xatırladaq ki, yen Fabia modelinin uzunluğu 4107 millimetr, eni - 1780 millimetr, hündürlüyü isə 1460 millimetr olacaqdır.

Skoda dizaynerləri ön panelinə üfüqi dekorativ zolağı və sağ tərəfdəki Fabia yazısını əlavə etməklə, hetçbekin interyerini canlandırmağa çalışıblar. Mərkəzi konsoldakı rəngli dizayn elementləri qapıların xrom dəstəkləri ilə birlikdə yeni modelin interyerini sələfi ilə müqayisədə daha müasir etmək vəzifəsini daşıyırlar.

Yeni Skoda Fabia modelinin təqdimatı gələn ayın əvvəlində keçirilməlidir. İlkin olaraq hetçbek kuzovlu Fabia modeli işıq üzü görəcəkdir. Universal kuzovlu versiya isə 2023-cü ildə debüt etməlidir. O zamana qədər, yeni hetçbek köhnə universal ilə paralel satılacaqdır.